من أول لمسة

My heart with U IOLers

2010-03-23T19:40:00.004+02:00

اللهم فرج كرب عائلتي الكبيرة في إسلام أون لاين

مركب ورق قلبي

2008-10-08T00:06:00.003+02:00

مركب ورق قلبي أوان فرحها دلوقتي

الدنيا ليل والفوانيس طالعة تنورها

2008-09-02T11:33:00.002+02:00

كل سنة وأنتم طيبين

و الفوانيس منورين

والكنافة & القطايف و اكلين

وبدعي ربنا يتقبل منا ومنكم الصيام والقيام والدعاء

وأن يكون شهر رمضان شهر خير وبركة علينا و عليكم وعلى كل الناس اللي بتحبوهم

وماتنسونيش من صالح الدعاء

قلبي ومفتاحه

2008-08-15T00:25:00.004+03:00

قلبي صعب أمره حط على بابه ثلاث أقفال كل قفل بمفتاح

قفل مفتاحه الصدق مابيقبلش غيرة عنده حساسية من الكدب بيعرفه حتى لو متغلف بورق سوليفان

وقفل مفتاحه عقلي بيفرق بين الصح والغلط ، بيوزن الأمور بميزان مختلف ليه حساباته ومعاييره الخاصة بيه لوحده

أما الثالث فمفتاحه كلمة واحدة تحسسه بالأمان كلمة كل بنت بتستناها، كلمة سحرية حتكسر السدود وتلغي المسافات و تفتح باب لمشاعر وأحاسيس جميلة بريئة

وإذا أجتمع ثلاث مفاتيح مع بعض

هنا بس قلبي حيسلم أمره

قــال وقلــت حوار مع أحد الحكماء

2008-07-03T18:50:00.003+03:00

قال: ما هي أجمل صفات المرأة؟
قلت: الحنان
قال: وأجمل صفات الرجل؟
قلت: الرحمة
قال: وأجمل ما في الطفولة؟
قلت: البراءة
*******
قال: ما أجمل ما في الشباب؟
قلت: الأحلام
قال: وأجمل ما في الشيخوخة؟
قلت: التقوى
قال: وأجمل ما في الرجولة؟
قلت: الحكمة
*******
قال: ماهي أرقى أنواع الصبر؟
قلت: حينما يجتمع مع الرضا
قال: هل للقناعة درجات؟
قلت: نعم هناك قناعة الاكتفاء وقناعة الصبر وقناعة الزهد.. والأخيرة أرقى الأنواع
قال: ماذا يعنى الحنان؟
قلت: أن يستريح الإنسان إلى شاطئ بعد رحلة سفر متعبة.. وان يجد صدرا يلقى عليه متاعبه دون خوف او استجداء أو ثمن
*******
قال: ما هي أرقى أنواع الحب؟
قلت: الأمومة.. لأنها حب بلا مقابل وعطاء بلا ثمن
قال: ما هي أعلى درجات الأخلاق؟
قلت: أن ينزّه الإنسان نفسه عن الصغائر.. ليس خوفا من أحد ولكن تقديرا لذاته وسموا بنفسه وحبا للفضيلة
قال: أيهما أعلى درجة العفو أم التسامح؟
قلت: العفو أعلى درجة.. لأن العفو يقترن بالمقدرة ولكن التسامح قد يقترن بالضعف وقد يتسامح الإنسان مكرها ولكنه لا يعفو إلاّ إذا كان راضيا
*******
قال: وماذا عن النجاح؟
قلت: إنسان يجفف عرقه مع نسمة صيف منعشة.. أجمل ما في النجاح انه يشعرنا بقيمة ما نفعل وانه أوسع أبواب الثقة وربما يكون أيضا أوسع أبواب الغرور
قال: كيف تنبت أشجار الغرور في أعماق الإنسان؟
قلت: مع أشخاص صنعتهم صدفة أو فرصة عابرة.. والصدفة والفرصة هما اقل الدرجات في سلم النجاح
قال: ما الفرق بين الإصرار والعزيمة؟
قلت: الإصرار ضيف عابر.. أما العزيمة صديق مقيم.. والإصرار يساندة الطموح.. والعزيمة تساندها الإرادة.. الطموح يتغير باختلاف الأيام والأشخاص والظروف ولكن
الإرادة أقوى من كل الظروف
*******
قال: ومن أنت؟
قلت: إنسان ضيع عمره في البحث عن حقيقة الأشياء واكتشفت أن الحقيقة الوحيدة المؤكدة هي الموت
وكل شئ بعد ذلك يحتمل التأويل
ألم اقل لك أنها صفقة خاسرة ولكننا نلعبها حتى النهاية مهما كان حجم خسارتنا فيها
*******
قل لمن يحمل هماً بأن همه لن يدوم
فكما تفنى السعادة هكذا تفنى الهموم

-----------------------------------------------------------------------------------------
حوار قرأته مؤخرا أثر بي أرسله لي أحد الأصدقاء

ليه ؟ مجرد سؤال

2008-06-06T01:20:00.006+03:00

بعد الشغل قضيت يوم لطيف قبلت صحابي في سيتي ستار مول ودخلت السينما مع صحبتي وروح قلبي شيرين وكان يوم لذيذ كسر روتين الحياة. وبعدين اتفرجنا شوية على المحلات وفجأة شيرين وقفت قدام محل وعجبها بلوزة ستان قلنا ندخل نسأل بكام عادي يعني
أول مادخلنا المحل ملقيناش فيه غيرنا وغير الناس اللي بتشتغل فيه ودة قلقنا شوية بس ده مامنعناش أننا نسأل السؤال
من فضلك البلوزة اللي في الفترينة بره اللي بحزام ستان بكام ؟
ردت البنت علينا هو الحزام مش بتاعها احنا اللي حطينة عليها بس لو حتشتريها حنديهولك مع البلوزة مفيش مشكلة
طيب ممتاز وكررنا السؤال بكام ؟
رد علينا بقى المرة دي الراجل اللي واقف مسك البلوزة يفرجها لينا وقال بس هي غلية شوية ؟
راحت شيرين مكررة السؤال يعني بكام ؟
راح الراجل ووشة مشرق بابتسامة عريضة رد وقال سعرها
ساعتها أضيقت قلت في نفسي ياخسارة يا سلمى كنت كويسة بقى بيجيلك هلاوس سمعية وأنت واقفة كله من كتر اقعدتك قدام مسعود ( للتوضيح دة لاب توب الشغل ) بالعشر ساعات كان بدري عليكي ما فوقنيش غير صوت شيرين وهي بتقول للراجل حضرتك معلش بتقول 7000 جنية قلها لأ 7300 جنية ( سبعة ألاف وثلاثمائة جنيه ده بس للتأكيد أنك قرأت الرقم صح )
طبعا أنا دخلت من مرحلة الهلاوس إلى مرحلة الصدمة وبدأت افتكر جدول الضرب والطرح علشان أحاول افهم الرقم وبصعوبة ما عرفتش أجمع غير كلمة واحدة
لية ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
رد بهدوء أصلها من ألمانيا
يا سلام سلم كدة بقى أداني المبرر اللي حيخلينا نقتنع بسعرها والمصيبة أنها من غير حزام كمان كانوا حيدوه لينا هدية
شيرين كان لسة عندها القدرة انها تتكلم فضحكت بسخرية وقالت له إن شاء الله حنعمل جمعية ونجيلك
أنا مش عرفة هل ممكن يكون في حد بيشتري بالسعر ده وبعدين انا لسة عندي مشكلة محدش جاوب على سؤالي
لية ؟
وعلشان تحاولوا تجابوا على السؤال صورتلكم البلوزة

كفاية ماتبسطهاش أكتر من كده

2008-05-07T09:54:00.005+03:00

أول ما سمعت موضوع أن العلاوة 30% اللي أصلا أنا مش حستفيد منها بحاجة حطيت أيدي على قلبي وقلت أسترها يارب وقلت لنفسي بلاش تشاؤم بقى يا بنتي يمكن خير وفضلت مستانيه المصيبة وأنتم عارفين وقوع البلا ولا انتظاره
لغاية ما سمعت زيادة البنزين الجنونية وبحكم أن عندي عربية صغنونة بروح بيها الشغل و بقضي مشاويري بيها و ده مش معناه خالص أني من أصحاب الأطيان و لا الأملاك و لازم احط فيها بنزين علشان تمشي وماينفعش مايه للأسف

لذلك أعاني اليومين دول من ارتفاع في ضغط الدم بسبب الفرسة و بوادر اكتئاب مسببة ليا صداع وعدم رغبة في الأكل

وحاسه إحساس عبد السلام النابولسي لما ادلق عليه الملوخية فوق دماغه وهو بيقول كفاية ماتبسطهاش أكتر من كده

المرآة

2008-05-02T02:04:00.003+03:00

عند دقات الساعة السابعة صباحا فتح عينية بتثاقل ثم جلس بعض الوقت على حافة السرير. ثم دخل كعادته يأخذ حمامة الصباحي
وهو يحلق ذقنه توقف فجأة و نظر طويلا لنفسه في المرآة وشعر للمرة الأولى أنه لايستطيع أن يتعرف على نفسه في المرآة و كأنه ينظر لشخص آخر، وللحظة شعر كأن الزمن توقف به و أحس بانقباض في صدره و تولد له شعور بغربة ممزوج بوحدة لم يألفه قط ثم أغمض عينية و أخذ نفس عميق وانتهى سريعا من حلاقة ذقنه
ثم ارتدى بدلته الأنيقة ووضع عطرة المفضل ثم تردد للحظات ثم أمسك بذاك القناع و وضعه على وجهة و نظر إلى نفسه في المرآة ليتأكد من هندامه ثم خرج مسرعا إلى عملة وهو يحاول أن يطرد هذا الإحساس الغريب الذي تملكه

قصة حياة وردة

2008-04-11T23:03:00.004+02:00

بتبدأ ببذرة ومع شوية مايه و شمس وهوا واهتمام تبدأ تشق طريقها للنور ولما توصل لقمة النضارة والجمال تبدأ تدبل

بالنسبة ليا بشوف في الوردة قدرة ربنا في خلقة ، بشوف البساطة و الجمال والرقة وازاي اجتمعوا علشان ينشروا البهجة والجمال في الدنيا وبستغرب أزاي بتقدر تختصر الكلمات علشان تعبر عن مشاعر شخص لأخر وكمان كل مرة معنى مختلف اعتذار ، امتنان ، تقدير ، حب

قصة حياة الوردة القصيرة بتورينا أن كل حاجة جميلة عمرها قصير لأن دي سنة الحياة علشان كدة مش لازم نضيع وقت وخلينا نعبر عن مشاعرنا لبعض

مجرد خاطرة جاتلي وأنا بشتري بوكيه ورد لأعز إنسانة على قلبي أمي

علشان أقلها قد أية أنا بحبها

إن مقدرتش تضحك ما دمعش ولا تبكيش

2008-03-23T09:16:00.006+02:00

وإن مافضلش معاك غير قلبك أوعا تخاف مش حتموت حتعيش

صباح كل يوم

2008-03-03T17:22:00.004+02:00

في فيلم أسمه Groundhog Day

البطل يصحى كل يوم و يلاقي كل حاجة بتكرر من الأول بعد شويه بيبقى حافظ الأحداث

أنا بقى حاسة أني جوة الفيلم ده

أقلق من النوم الصبح وأفضل في السرير لغاية

منبه الموبيل ما يرن اقفله بسرعة قبل ما يصحي أمي أفوق بسرعة بعد ما أفكر نفسي بالحاجات اللي واريا النهاردة في الشغل أخرج البلكونة وعلى حسب الجو اختار هدومي البس وانزل

وأنا بفتح باب العربية يجيلي الراجل اللي بيمسح العربية ويقلي صباح الخير يا أستاذة أنت نازلة بدري النهاردة أبتسم و أسكت لأني كل يوم بنزل في نفس الميعاد ويبدأ يسمح العربية اللي بتبقى متبهدلة من الشجرة اللي بركن تحتها

وأنا بسخن العربية تنزل ست وبناتها الاتنين ساكنين في عمارة قدمنا علشان توصلهم المدرسة وبعدين تعدي شابة شكلها في كلية طب

وبعدين تنزل حفيدة جرنا مع مامتها علشان تركب اتوبيس المدرسة ويمر قدماي ولد ماسك أخته اللي أصغر منه في أيدة رايحين المدرسة وبعدين يعدي راجل وطول وهو ماشي يبص في ساعته

بعدها يعدي قدامي راجل كبير في السن شعرة ودقنه بيض لون التلج بيمشي بصعوبة شديدة بيسند على العصاية بتاعته ممكن تشوف التجاعيد على وشة من ورا النظارة أول حاجة تلفت نظرك ليه أنه بيسلم على ناس وهو ماشي تقريبا ما بيسبش حد في الشارع إلا ويسلم عليه بالرغم من أنه ما يعرفهومش

أول لما يعدي قدام عربيتي يقف و يبتسم ليا ويقلي صباح الخير أقلة صباح النور يبتسم ويكمل مشي الغريبة أني معرفش الراجل دة ولا حتى أعرف أسمة لكن مع مرور الوقت بقيت متعودة على الصباح وهو لما يعدي قدام العربية ومبقاش منتبه يقف لغاية ما ابصلة وابدلة التحية علشان يكمل مشوارة .

أجمل حاجة في راجل دة أن ابتسامته معدية أول ما يسلم على حد تلاقية بيبتسم هو كمان من غير ما يحس

بعد فترة بقيت لما أشوفه تجيلي أفكار كتير يعني أية اللي يخلي راجل كبير في سنه ينزل بدري قوي كده بيهرب من وحدة ولا عنده نظام مثلا متعود عليه ولا مضطر ينزل يقضي طلابته بنفسه لأن عمري ما شفت معاه حد كل يوم أتخيل حاجة شكل

بس رؤيته في حد ذاتها بقت بتعملي تفاؤل وأقول في سري الحمد لله أن لسه في حد بشوش كده وغصب عني ألاقي نفسي بفكر ازاي بيعرف يحافظ على الابتسامة دي

الأسبوع اللي فات بدأ نفس البداية بنفس السيناريو إلا حاجة واحدة لما عدى الراجل ده كان باصص في الأرض و ما سلمش على حد وهو ماشي

واختفت من على وشه الابتسامة الهادئة الجميلة و مكنها ظهر حزن عميق حولت أقلة صباح الخير لكنه لم ينتبه ليا وكمل طريقة ومن يومها ما شفتوش تاني :(

لحظة الفراق

2008-02-07T09:30:00.000+02:00

لما بغمض عيني بفتكر ضحتك بسمع صوتك في ودني مره قلت لأمي أنا خافية أنساك أنسى ملامحك أنسى دفى حضنك ردت عليا وقلتلي في حاجات بتتحفر جوانا استحالة تتنسي والنهاردة بعد 11 سنة يااااه كل السنين دي مرت صحيح يا أمي طلع عندك حق في حاجات ما بتتنسيش
زي النهاردة آخر يوم شفتك فيه بيمر قدامي كأنه حلم لسه شيفاه أمبارح كان آخر يوم رمضان ليلية العيد الصغير دخلت عليا وقلتلي بتعملي أية
بذاكر -

مذاكرة أية يا بنتي سيبك النهارده ليلة العيد خدي اجازة كدة من النهاردة وأيام العيد علشان تعرفي تكملي -
أية يا بابا أنت مش عيزني أجيب مجموع ولا أية شكلك عايز تاكل عليا الهدية اللي متفقين عليها -
وهو أنا أقدر يلا سيبي اللي في أيدك وعمللنا شاي وتعالي نشربه مع بعض قبل ما انزل -
أقعدت أنا وأنت وماما مع بعض دار حوار مافهمتش حاجة منه غير بعدين (اكتشف كأنك كنت بتوصينا على حاجات كأنك كنت حاسس ) بعدها رحت فاتحة حوار تاني
صحيح أحنا حنعمل اية في العيد -
زي كل سنة حنزور العيلة ونعيد عليهم -
بس أنا نفسي نعمل حاجة مختلفة أنا زهقانة -
إن شاء الله ما تستعجليش -
إن شاء الله طبعا بس إن شاء الله حنعمل أية -
لم أسمع رد ولقيتك سرحت معرفش لية أنا كمان سكت بعدها بشوية قطعت السكوت
أنا حقوم أنزل مشوار صغير -
وسألت أمي عايزة حاجة أجيبهالك امي قلتلك لأ انت حتتأخر قلتلها مش عارف بس إن شاء الله حروح أودي حاجات لواحد صحبي وارجع على طول
وانت نازل وقبل ما تقفل الباب رحت راجع خطوة لورا و بصتلي نظرة عمري ما حنساها وابتسمت وبعدين قفلت الباب معرفش لية انا اتجمدت في مكاني لحظة وبعدين رحت قلت لماما
اية دة بابا ما قلش لا إلاه إلا الله قبل ما ينزل -
ماما ردت عليا : يمكن نسي معلش -
غريبة بابا عمره ما بينسى يقلها قبل ما بينزل طلعت البلكونة أشوفك لقيتك طلعت بالعربية -
بعدها حسيت بقبضة في صدري بعد شويه بدأت أحس أني مضايقة من غير سبب واضح لدرجة أني بدأت أعيط من غير سبب
أمي قلتلي: بتعيطي ليه قلتلها مش عرفة حاسة إني مضايقة استهدي بالله و اقومي صلي العشا في حد يعيط ليلة العيد كدة

مرت ساعة أتنين تالتة أربعة ومارجعتش
أمي كان القلق حيموتها وبدأت تحاول تكلمك عند صحابك محدش بيرد مابقناش عارفين نعمل أية بدأت أمي تنهار وقلتلي انا متأكدة أن في حاجة حصلت

لما الساعة جت 12 بلليل أمي راحت بصالي وقالتلي قلبي بيقلي أبوكي حصل له حاجة كانت أول مرة أشوف ماما منهارة بعدها جالنا تليفون اللي ماما كانت خافية منه
أمي حطيت أديها على قلبها وبصلتي والدموع بتنزل من عينها زي المطر ما بقتش محتاجة اسألها لغاية ما قلتلها : أبوكي مات
ساعتها حسيت أن في سكينة دخلت قلبي مش عرفة أتنفس جيت أقوم أجري على ماما علشان تخدني في حضنها ماعرفتش أقوم فضلت في مكاني مش عرفة قد أية

عارف أصعب حاجة أية لما كنت أروح في النوم وأصحى الصبح ولما أفتح عيني وللحظة ببقى ناسية كل حاجة كأن مفيش حاجة أتغيرت وأول ما أفوق بحس بنفس السكينة اللي بتدخل قلبي أبي الحبيب لو كنت أعرف أن دي كانت لحظة الفراق كنت قلتلك قد أية بحبك قوي قد أية حتوحشني قوي ، كنت سألتك مليون سؤال ، كنت طلبت منك تسامحني لو مرة زعتلك في حاجة

بابا وحشتني قوي أكتر من أي وقت فات

حاجات صغيرة بس بتفرق

2008-01-09T20:27:00.000+02:00

اكتشفت أن علاقتنا بالناس بتتشكل بحاجات ابسط مما نتصور ومع الوقت تلاقي في ناس قريبين قوي من قلبك بسبب الحاجات دي
مكالمة تليفون تسأل عليك بدون سبب
مسج تقولك سلامتك وأنت عيان أو كل سنة وانت طيب
بنجور وسميل في بداية اليوم على المسنجر من واحدة صاحبتي

دردشة مع حد من صحابك بعدها تحس براحة وانبساط
كلمة شكر ياه بتفرق قوي مش عرفة لية مابقتش بتتقال لأن لسبب مجهول بقى أي حاجة بتعملها بمرور الوقت بتتحول لواجب عليك مع أنها مش حتكلف حد لما يقلها أي حاجة بس بتحسس اللي قدامك بالتقدير

وحاجات تانية كتير كلها صغيرة يمكن مش بناخد بالنا منها بس بتفرق

عزيزتي 2008

2007-12-29T23:49:00.000+02:00

عزيزتي 2008 أراك من بعيد آتية تهرولي وينقصك خطوتين لتصلي لخط النهاية لتعلني بداية جديدة

وبحكم أننا ستكون بيننا عشره وستطول لمدة 12 شهر بهم 366 يوم بالتمام زيادة عن 2007 بيوم ، أنا بطبعي أتفاءل بكل ما هو جديد ولا افترض سوء النية حتى يثبت العكس
لذلك أريد أن افتح معكي صفحة جديدة بيضاء ونكتب في أول السطر " بسم الله الرحمن الرحيم "
وبعدها أسمحي لي أن أنظر للوراء نظرة سريعة أوعدك أنها لن تطول حتى أراجع نفسي في أحداث عام من عمري مضى وبعدها دعينا نحاول أن نخطط سويا إذا أمد الله في عمرنا ماذا سنفعل سويا حتى تكوني متميزة مختلفة عن أخواتك السنوات الأخرى
ولكني أحتاج لوعد منك أن تكوني طفلة باسمة هادئة تدخل السعادة على قلبي و إياكي وتقلبات المزاج و المفاجئات غير السارة فلا أخفي عليك سرا أنني تعبت ولا أقوى على تحمل المزيد وكل واحد مننا يحتاج أحيانا إلى هدنة يستطيع فيها أن يلتقط أنفاسه ليقدر على مواصلة المشوار

إذا كان هذا الاتفاق يناسبك فأنا في انتظارك بكل ترحاب وارقب وصولك فاتحة ذراعي لنحقق سويا ولو جزء بسيط من أحلامي الأبسط

صداقة عمر

2007-12-22T11:57:00.000+02:00

عارف امتى تقول ان الشخص ده صديق عمرك و أنك بتحبه مش زي أي حد
لما تتشاركوا في كل حاجة الصغيرة قبل الكبيرة لما العشرة تخليكوا تكملوا جمل بعض لما تبقى معاه على طبيعتك و تلاقي احلى ذكرياتك كلها معاه لما ضحتك تطلع من القلب لغاية ما عينيك تدمع ، لما تقضوا طول النهار مع بعض و الحكاوي ما بينكم ما تخلص
لما تبقى مش قادر تستنى علشان تحكيله أية اللي مضايقك أو أية اللي مفرحك
لما تعرف هو زعلان ولا فرحان من قبل ما يتكلم
لما يتألم .. قلبك يبكي قبل ما عينه تبكي
ولما يفرح تبقى فرحتك طالعة من جوة قوي ......

فرحة من جوة

في أيام من عمر الواحد هي اللي بتفضل تفتكرها مهما مرت السنين ثاني يوم العيد كان يوم منهم ، كنت مع ميعاد مع فرحة مش عادية فرحة من اللي تخلي عينك تدمع من السعادة. طبعا اصله مكنش يوم عادي ده كان خطوبة اقرب حد لقلبي ..
مها مليون مبروك يارب يارب يتمم بخير ليكي أنت ومحمد وأنتم اللي ينطبق عليكم الطيبون للطيبات.
محمد خلي بالك من مها ويارب يفرح قلبك زي ما فرحت قلب صحبتي و يارب يسعدكم زي ما فرحتوني
اصلها صداقة عمر

** اللهم بارك لكما وبارك عليكما وجمع بينكما في خير

كل سنة و الناس الطيبة أطيب

2007-12-16T13:15:00.000+02:00

الأيام جريت بسرععععععععة وخلاص العيد الكبير جيه صحيح أنا مش مصدقة بس ده لايمنع أننا بدعي من قلبي
أن يكون
كل الناس الطيبة أطيب وأحلى وأجمل
يارب واللي مش منهم أهديه يارب
يارب أهدينا وأرضينا وفرج كربنا وكرب كل مسلم
يارب طهر قلوبنا ونور أبصارنا و اغفر ذنوبا
يارب يكون العيد ده فتحت خير علينا كلنا
يارب كل سنة وأمي واخويا بخير وبصحة وبسعادة وحقق كل اللي نفسهم فيه يارب يارب يارب
يارب أهلي وأصحابي وكل الناس اللي بحبهم أكرمهم و تقبل منهم العمل الصالح في الأيام المباركة اللي بنعشها

وكل سنة و أنتم معيدين وفرحانين

عندما يكمل كل مننا الآخر

2007-12-10T09:46:00.000+02:00

عندما يصبح الألم مشترك ، عندما يصبح الضعف قوة والقوة مصدرها الآخر

عندما تتكلم العيون و يسكت اللسان لأنه يعجز عن التعبير عن المشاعر

عندما أطرد الخوف ليسكن مكانه إحساس بالأمان

عندما أعلن على الملأ أني وجدت شيء كنت أبحث عنه ولا أعرفه

عندما يكمل كل مننا الآخر

عندها فقط سأسلم قلبي لشخص لا أعرفه

** شاهد الفيديو فهو حقا ملئ بالمشاعر الجميلة و هو سبب تدفق هذه الأفكار على خاطري

اضحك كركر

2007-11-26T10:33:00.000+02:00

لازم نعترف أننا شعب دمه خفيف ولا نكف عن إطلاق النكات والطرائف وذلك ينطبق على كل طبقات الشعب

من الوزير للغفير

تيجي نحلم ببكرة !!

2007-11-05T08:46:00.000+02:00

أنا سمعاك دلوقتي بتقول اية المجنونة دي حلم اية وكلام فارغ اية

يمكن يكون عندك حق تندهش أصل أنا اكتشفت فجأة أننا بطلنا نحلم ولو غلطنا وحلمنا بنكتف الحلم بقيود الواقع فبيموت الحلم قبل مابيشوف النور

شفت طير بيطير بجناح مكسور ولا مربوط اهو الحلم زي الطير بيحب الحرية عايز يفرد جناحتة علشان يعلا في السما لغاية ما يوصل للسحاب

بكرة غالي قوي يستحق إننا نحلم بيه بكرة حيبقى أحلى لو شايفينه قدامنا لو بطلنا نبص تحت رجلينا علشان نعرف نشوف نهاية الطريق

أنا عن نفسي ححلم ببكرة بس عيزاك تحلم معايا علشان ماحلمش لوحدي

There is nothing like dream to create the future. Utopia to-day, flesh and blood tomorrow

victor Hugo

يا باب يا مقفول ..أمتى الدخول

2007-10-27T17:07:00.000+02:00

يا باب يا مقفول ... أمتى الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا... كنت أقول

وعجبي !!!

رسالة إلى طفلة....لا تتركيني وحدي

2007-10-25T10:03:00.000+02:00

جوايا طفلة صغيرة شقية وعندية عايزة تلعب وتنطط بتحب الحياة قوي ولما تفرح بتفرح بجد من قلبها ولما تزعل بتزعل قوي تعباني معها وبتعبها معايا يعني أحنا الاثنين تعبين بعض طول الوقت

تعباني معها لأنها بتثق في ناس وبترفض تشوف كدبهم وغشهم ورغم أنها في كل مرة بتتجرح و بتتوجع وتتألم إلا أنها مابتحرمش

بتتصرف على طبيعتها مع الناس من غير ما تفكر مابتسمعش كلامي لما اقلها أن الناس مش عيزه كده مش عيزه الوضوح والصراحة أو بمعنى أصح مش بتفهمهم لأنهم معذورين برده من كتر ما بقت حياتنا رمادي ما بقوش يعرفوا الأبيض من الأسود بقى عندهم عمى ألوان بقوا يصدقوا الكدب ويكدبوا الصدق

بتعبها معايا لأننا حاسة أننا بخنقها جويا مش بهتم بيها بانساها ساعات وسط الضغوط والمشاكل اليومية بالرغم من أننا محتاجها قوي لأنها هي اللي بتصبرني وتقلي أن بكرة حيكون احسن أكيد

هي كمان اللي بتمنعني أن أتغير لأننا مقتنعة أن الناس بتخسر نفسها في اليوم اللي بتخسر فيه الطفل البرئ اللي جواها
علشان كده بقلها ماتزعليش مني إني كتير بنساكي بس عذري أن احيانا بتكون ضغوط وهموم الحياة اقوى مني استحمليني ماتسيبنيش في يوم من الأيام لأنك بالنسبة ليا طوق النجاة علشان التيار ما يسحبنيش واغرق في بحر الحياة

لما المطر يغسل شوارعنا القديمة والحارات

2007-10-17T21:54:00.000+02:00

في المساء بدأت قطرات من الندى في التساقط بهدوء وبحكم أني اشتقت للمطر وللشتاء تحديدا بعد فصل طويل من الصيف جلست في البلكونه أتأمل السماء والشارع الذي أصبح شبه خالي من المارة على غير العادة بالرغم من أن شارعنا شارع داخلي ولكنه مليء بالحياة والمارة طوال الوقت

ومع تقدم ساعات الليل لم تكتفي السماء بهذه القطرات و تكاثرت السحب والغيوم أكثر وأكثر واشتدت الرياح و أظلمت السماء تماما كأن كل عوامل الطبيعة اتحدت فجأة لإخفاء ضوء القمر والنجوم واجتاحني شعور بضيق شديد و بدأ صوت الرعد يهز السماء ثم يتبعه برق يومض غرفتي بشدة

لم أستطيع النوم هذه الليلة لأنني بالرغم من حبي الشديد للمطر ولكني أشعر بخوف من صوت الرعد الذي يجعلني قلقة ومترقبة ومع كل صوت جديد أشعر كأني اهتز من الداخل و أبدأ بترديد دعاء المطر و أتوجه إلى الله بالدعاء والاستغفار

وفي الصباح استمر المطر بعض الوقت ثم بدأت أشعة الشمس تظهر بين السحاب وبدأت السماء تصفو لتعلن أشعة الشمس انتصارها في النهاية وساعتها كأني أرى الكون بالألوان لأول مرة فالسماء لونها لبني رائع (ومش رمادي مثل كل يوم) والشجر أخضر مبهج وأما الهواء فمنعش يذكرني بهواء البحر

ومع تبدل حالة الجو تبدل معه حالي تماما وشعرت بارتياح و سكينة جميلة وكأن المطر وهو يغسل الشجر والشوارع غسلني من الداخل

التقلب في الأحوال الجوية بين ليلة وضحها جعلني أتأمل عظمة خلق الله وأن أرى أن دوام الحال من المحال وأن بعد العاصفة وما تحمله من غيوم وأمطار لابد أن تسطع الشمس من جديد ليصبح الكون أحلى حتى ولو بعد حين

و لذلك فأنا في انتظار سطوع الشمس ولكن هذه المره لي ..

الحياة سلسلة من الاختيارات

2007-09-27T15:00:00.000+02:00

في سنوات الأولى من عمرنا نجد دائما من يقوم بالاختيار نيابة عنا فنولد نجد أن أبوينا يقوموا بكل شيء بدل عنا وفي هذه السنوات ننعم براحة البال حتى نكتشف أن العالم أكبر بكثير من بيتنا الصغير الهادئ الجميل و نفقد رويدا رويدا إحساسنا بالأمان و نكتشف أن الحياة عبارة عن سلسلة من الاختيارات والتي تتباين في النهاية في أهميتها ولكنها تجتمع في النهاية لتشكل حياتك .

----------------------------------------------------

ولذلك أجد نفسي مع كل موقف يستدعي من مني اتخاذ قرار هام يتكرر معي نفس الشعور الغريب :

إحساس بعدم الراحة مع كل نفس يخرج من صدري، قلق ، عدم نوم من كثرة الأفكار التي تراودني و شعور بالاستياء من عدم قدرتي على حسم موقفي سريعا ...

وتأتي على خاطري رباعية رائعة لصلاح جاهين :

لا تجبر الإنسان و لا تخــيــــره
يكفيه ما فيه من عقل بيحيــــره
اللي النهارده يطلبه و يشتهـــيه
هو اللي بكره ح يشتهي يغيـــره
و عجبي !!

وأتساءل في كل مرة عن سبب هذه الحالة وهل أنا السبب لأني شخصية مترددة مثلا أم هي طبيعة بشرية يمر بها أي شخص عندما يوضع في موقف الاختيار ولكني لا أجد إجابة على سؤالي ..

أنت واقفة في الممنوع

2007-09-18T12:06:00.000+02:00

أنا وعربيتي ما بينا علاقة خاصة جدا لأنها عزيزة عليا جدا كفاية انها مستحملة المشوار كل يوم من مصر الجديدة لغاية الدقي ومن كتر ما بقضي فيها وقت نصف حياتي تقريبا بقيت بحس أن العربية بتحس بيا لما بكون زعلانة او فرحانة وبيبقى مزجها زي مزاجي وخصوصا أنها بتشاركني لحظات كتير في حياتي السعيد منها والحزين وعربيتي شقية بتحب تعمل فيا مقالب كدة مش لطيفة بس علشان تحسسني بغلوتها عندي.
بس امبارح اتعرضت لمقلب بس ولا الوقت ولا المكان كانوا مناسبين خالص...
المكان : كوبري 6 اكتوبر
الزمان :رمضان قبل الفطار بحاولي ساعتين
بجد ده أسوأ كابوس ممكن حد يتعرضله أن عربيتك تقف على كوبري أكتوبر قبل الفطار بساعتين ساعتها حتعرف معنى القضاء والقدر وتحس انك مش بيدك حاجة تعملها غير الدعاء أن ربنا يفك كربك .
وانت واقف ولا حول ولك من قوة كل شوية عربية تعدي عليك و حد يبصلك شذرا كدة بقرف لأنك موقف الكوبري كأن دي حاجة بأيدك مثلا أو أنا غاوية أقف على الكوبري أتشمس قبل الفطار وطبعا كله مستعجل عايز يوصل بيتهم قبل الفطار ومحدش بيفكر يقف يساعدك .
لغاية ما ظهرت بركة دعاء أمي حد وقف ليا وكتر خيره زقني لغاية ما نزلني من على الكوبري و وصلني لأول شارع على الجنب عرفت ادخل فيه وبعدين سابني ومشي ..

بعد ثواني اكتشفت اني واقفة في حته مينفعش فيها الركنه خالص جنب المنصة في الاتوسراد قدام باب الاستاد واكتشفت كمان انه يوم ماتش الأهلي والزمالك كأن مش كفاية اننا في رمضان قبل الفطار بساعة لأ كمان يوم ماتش القمة و السادة الظباط وامناء الشرطة مش مبسوطين من وقفتي وعيزني امشي بسرعة وكل شوية حد يقلي " أنت واقفة في الممنوع "!!! افهم فيهم أن العربية مش بتدور يا جماعة مش بكيفي واللهي ولكن لا حياة لمن تنادي ومحدش فيهم فكر يساعدني ساعتها عرفت أني مكنش المفروض أساسا انزل من بيتنا يوميها
طبعا مكنش فيه حاجة ممكن اعملها غير إني اقعد في العربية استني اخويا ينجدني .. والانتظار في العربية خلاني أشوف حاجات عجب
شتيمة و معاكسات وهتفات أقل حاجة ممكن أقول أنها بذيئة جدا جدا متنفعش خالص في رمضان ولا غير رمضان بقيت نفسي اقلهم يا جماعة انتم في رمضان مش ممكن علشان ماتش نخسر صيامنا بس طبعا لم أجرأ اعمل حاجة من دي خالص .

من أمبارح نفسي أقول أن لما تلاقي حد واقف على الكوبري ياريت لو ماحبتش تساعده يبقى على الاقل تعاطف معاه وبلاش التعليقات السخيفة والشتيمة و النظرات اللي بقرف لأن محدش عارف أنت ممكن يحصلك نفس الموقف
نفسي برده نشوف فتوى بتقول ان مساعدة بنت واقفة على الكوبري في رمضان لها أجر من فطر صائم مثلا حاجة كدة يعني أخر حاجة أن محبكش نعمل ماتش الاهلي والزمالك في رمضان أصلها مش ناقصة

حالو يا حلو رمضان كريم يا حلو

2007-09-12T13:12:00.000+02:00

أول ما بسمع أغنية حالو يا حلو رمضان كريم يا حلو بتخطر على بالي ذكريات و أفكار كتير بفتكر الفانوس اللي كانت بتجيبوا جدتي ليه كل سنة بحن قوي لحضن بابا وهو بيقلي كل سنة وأنت طيبة وبفتكر لمتنا كلنا على السفرة على الفطار وحاجات ولقطات اكتر بتمر بسرعة قدامي..
بس السنة دي حاسة أنه حيكون رمضان مختلف و متفائلة بيه جدا وحاسه انه جاي وحيجيب الخير والفرج معاه مش عرفة ليه بس يمكن علشان مشتقا ليه و محتاجاه قوي ..
نفسي في حاجات كتير كتير كتير وطمعانة في كرمك يارب
يارب ....
يارب ...
يارب...

يارب أنت المطلع على في نفسي من غير ما أتكلم ، يارب اغفر وارحم وأنت خير الراحمين