أنا سمعاك دلوقتي بتقول اية المجنونة دي حلم اية وكلام فارغ اية
يمكن يكون عندك حق تندهش أصل أنا اكتشفت فجأة أننا بطلنا نحلم ولو غلطنا وحلمنا بنكتف الحلم بقيود الواقع فبيموت الحلم قبل مابيشوف النور
شفت طير بيطير بجناح مكسور ولا مربوط اهو الحلم زي الطير بيحب الحرية عايز يفرد جناحتة علشان يعلا في السما لغاية ما يوصل للسحاب
بكرة غالي قوي يستحق إننا نحلم بيه بكرة حيبقى أحلى لو شايفينه قدامنا لو بطلنا نبص تحت رجلينا علشان نعرف نشوف نهاية الطريق
أنا عن نفسي ححلم ببكرة بس عيزاك تحلم معايا علشان ماحلمش لوحدي
There is nothing like dream to create the future. Utopia to-day, flesh and blood tomorrow
victor Hugo
27 comments:
دايما كلامك يا سلمى بيكون جميل وحقيقي وكتير منا حسه اوي
اكيد لازم نحلم وبيكون جميل اوي ان يكون في حد معاكي بيشركك الحلم
انا كمان هحلم ببكرة معاكي
ويارب يحقق كل احلامك
سلمى المتألقة
احلى حاجة هى انك تحلمي
وكتير الواحد حلم وبعد وقت مش كبير اكتشف ان الحلم الى كان فكرة بعيد اوى اصبح حقيقة
ولو محلمناش هنموت
البوست حلم
عادل طوبه
شوفى يا سلمى الحلم بيكون للبشر يعنى لاحفاد سيدنا آدم عليه السلام
وأظن إن النوعيه ده من البشر انقردت وخصوصا فى مصر
أظن إن البقيه المتبقيه فى هذا البلد من احفاد الثيران إلى مربوطه وكل حاجه بتعملها فى الحياة إنها تلف ... وتلف ... وتلف ... وتلف
بس كفايه أحسن دماغى لفت
احنا أموات بس بنحاول نكمل حيتنا وأحنا بنلف ... ونلف
مش عارف هنفوق امته ونبطل لف ونركز فى أحلمنا ونحاول ... تعرفى أنا نفسى أفتكر أحلامى القديمه .. حتى أحلامى القديمه مش فكرها
الله يسمحك قلبتى عليا المواجع
واسيبك بقى علشان عندى شوية ....
تعرفي يا توتة
بلاش تعرفي
فاكرة .. لما كنا بنكتب أحلم ولا يهمك
ولما كنا بنقول أننا بتربى واحنا صغيرين على السقف الواطي اللي ما خليناش نحلم
فاكرة
وان احنا لازم نعمل حاجات كتير مجنونة تخللي الناس تتعلم الحلم
حتى لو الناس قالت علينا مجانين، تعرفي يا توتة
يمكن الناس عاوزة مجانين
وفاكرة بعد ما كتبت موضوع أحلم ولا يهم، توم بيترز الإداري الشهير نزل بعدها بسنة كتابه تجرأ واحلم
وكنا قاعدين ينضحك ان احنا سبقنا الراجل
مش عارف اقولك ايه يا بنتي الكبيرة
اقولك .. خلينا مجانين ونحلم .. تسلم ايديكي اللي فتحت أبواب حلوة وأمل جميل
على فكرة اقرأوا الموضوع ده .. أهو حاجة تنفع بدل ما أجي بإيدي فاضية
http://www.islamonline.net/arabic/economics/2001/03/article7.shtml
http://www.sindbadmall.com/product.asp?StoreId=6&CatId=41&ProductId=5078
شريط أحلم ولا يهمك
هو صحيح لو بطلنا نحلم نفوق ..
بس برده .. قبل ما تحلم فوق .. احلم وانت فايق
:)
حد يقدر يقول عليكي مجنونة أنت ست العاقلين يا بنتي
عارفه يا سلمى إحنا ليه بنخاف نحلم .. علشان إحنا ممكن نحلم حلم ونعيشة وبعدين نلاقي إن الحلم ده لا يمكن يتحقق علشان كده فعلا لازم نحلم وإحنا فايقين
تحياتي لأجدع بوست
حلمت خير اللهم اجعله خير إن واحدة أعرفها وتقريبا اسمها سلمى، كتبت حاجة عن الحلم
وكان خير اللهم اجعله خير لابس أبيض في أبيض
بس كان في نقطة سودا
برسيل هو الوحيد اللي هيطلعها :D
لا بجد بقى
حلمك لسة في ايديك
حاول ما يموتش فيك
و الله الحلم جميل
بس كتير قوي حلمت بس في الاخر
!!!
و كان السبب في ده بشر
تسلم ايدك يا سلمى يا جميلة جدا جدا
معاكي قوي اننا مينفعشي نبطل نحلم.. لكن المهم منبطلش نحاول نحقق أحلامنا.
تحياتي يا حبي
اسعدنى جدا اكتشاف مدونتك
على فكرة اسم التدوينه جميل اوى
خالنى سرحت شوية بس رجعت تانى
لضغوط الحياة اللى بتقتل أى حلم
حتى ولو كان بسيط
تحياتى لك وارجو ان نتواصل
أحمد مصطفى
الاحلام ضرورية لاستمرار الحياة
لكن الحلم سهل والاهم السعي والاصرار على تحقيقه
الله يرحمها أحلامى
بتطلع فى الروح
يارب ييجى الفرج قبل ما تموووت
ياريت تجيلى النفس و احلم زى ما كنت بحلم لغاية سنتين فاتوا
من ساعة ما بدأت شغل بعد ما خلصت الدراسة... أحلامى تساقطت
بس كل شوية بجمع حبة و حبة يقعوا
سامح قال جزء كبير من الواقع
شكراااااا على الموضوع الجميل
كفاية انك فكرتينى غن ليه أحلام
الحياه حلم بلا حدود
حلم كبير
والجنة حلم
والسعادة شيئا نسبيا وليس مطلقا
السعادة حلم
والدفئ حلم
بلا حــــــــدود
أحمد
الحلم الجميل البيت الصغير
كله راح كله ضلع
كله ادمر كله اتكسر
فعلا اللي بيحلم حلم ويصمم إنه يحققه
بيتحقق ولو بعد حين حتى لو تعب حتى لو يأس أحيانًا لكن في النهاية بشوية اجتهاد الحلم بيتحقق ويبقى حقيقة
مدونتك رائعة
لو بطلنا نحلم نموت
لو عاندنا نقدر نفوت
لو عدينا مرة .. خلاص
لو ردينا .. ضاعت خلاص
حبة صبر حبة حماس
يبقى الحلم صورة و صوت
لو بطلنا نحلم نموت
بالعكس انتي ست العاقلين
ربنا خلي عالم الحلم دا علشان منتجننش
علشان يبقي في امل وداف اننا الحلم اللي رسمناه يبقي حقيقه علي الواقع
بس يمكن كتير مننه الصوره بضيه وسط الكراكيب
ومش بتتحول لواقع
تحياتي البوست رائع بجد
طبعا لازم الواحد يحلم ببكره وكما قال الشاعر
احلم معايا
ببكره جاي
ولو ما جاش
احنا نجيبه بنفسنا
مهما نقع
نقدر نقوم
نشق نتحدى الغيوم
نلاقي ليلنا ألف يوم
بس احنا نحلم
وبرضه كانت عاجباني أغنية لمحمد منير اسمها قبل ما تحلم فوق بحبها أوي الأغنية دي..
بلوج جميل.. ربنا يكرمك
اي والله عندك حق
هو أساسا مفيش حل الا كده
ومنحلمش ليه
نحلم وماله
*************
الحلم فعلا والتخيل هو مفتاح الابداع
وأفتكر ده اللي اعتمد عليه ا عمرو خالد في صناع الحياه
تحياتي للبوست الجميل
لم يتبق لنا سوى الاحلام
هو انت عملتي الليزر وماشفتوش تدوينات تانية
ايه يا توتة
قبل ما احلم
ياريت نعرف معنى الحلم
http://sadbrd.blogspot.com/2007/05/blog-post_22.html
احدى تدويناتى القديمة
تحياتى
صحيح بكره غالى
لكن الحلم احيانا بيكون صعب جدا لدرجة الاستحالة
فما بالك بتحقيقه
عجبنى جدا فى التدوينة قدرتك على توصيل فكرتك باقل عدد من الكلمات
ومقولة فيكتور هوجو رائعة للغاية
وذكرتنى بابيات قالها شوقى فى مئوية ميلاد هوجو
اسمحى لى اكتبها
ما جلَّ فيهم عيدُك المأْثورُ
إلا وأَنت أَجلُّ يا فكتورُ
ذكروكَ بالمئة السنينَ ، وإنها
عُمرٌ لمثلكَ في النجوم قصير
ستدوم ما دامَ البيان ، وما ارتقتْ
للعالمينَ مداركٌ وشعور
ولئن حجبتَ فأنت في نظر الورى
كالنجم لم ير منه الا النور
تحياتى
والسلام
....رائع
بجد بوست متميز
سلمت يداكى
يله نحلم بس اوعي حد يصيحنا
بصراحة معنديش كلام اقوله غير ان البوست جاااااااامد جداااا والله
Post a Comment