Monday, March 3, 2008

صباح كل يوم


في فيلم أسمه Groundhog Day

البطل يصحى كل يوم و يلاقي كل حاجة بتكرر من الأول بعد شويه بيبقى حافظ الأحداث

أنا بقى حاسة أني جوة الفيلم ده

أقلق من النوم الصبح وأفضل في السرير لغاية

منبه الموبيل ما يرن اقفله بسرعة قبل ما يصحي أمي أفوق بسرعة بعد ما أفكر نفسي بالحاجات اللي واريا النهاردة في الشغل أخرج البلكونة وعلى حسب الجو اختار هدومي البس وانزل

وأنا بفتح باب العربية يجيلي الراجل اللي بيمسح العربية ويقلي صباح الخير يا أستاذة أنت نازلة بدري النهاردة أبتسم و أسكت لأني كل يوم بنزل في نفس الميعاد ويبدأ يسمح العربية اللي بتبقى متبهدلة من الشجرة اللي بركن تحتها

وأنا بسخن العربية تنزل ست وبناتها الاتنين ساكنين في عمارة قدمنا علشان توصلهم المدرسة وبعدين تعدي شابة شكلها في كلية طب

وبعدين تنزل حفيدة جرنا مع مامتها علشان تركب اتوبيس المدرسة ويمر قدماي ولد ماسك أخته اللي أصغر منه في أيدة رايحين المدرسة وبعدين يعدي راجل وطول وهو ماشي يبص في ساعته

بعدها يعدي قدامي راجل كبير في السن شعرة ودقنه بيض لون التلج بيمشي بصعوبة شديدة بيسند على العصاية بتاعته ممكن تشوف التجاعيد على وشة من ورا النظارة أول حاجة تلفت نظرك ليه أنه بيسلم على ناس وهو ماشي تقريبا ما بيسبش حد في الشارع إلا ويسلم عليه بالرغم من أنه ما يعرفهومش

أول لما يعدي قدام عربيتي يقف و يبتسم ليا ويقلي صباح الخير أقلة صباح النور يبتسم ويكمل مشي الغريبة أني معرفش الراجل دة ولا حتى أعرف أسمة لكن مع مرور الوقت بقيت متعودة على الصباح وهو لما يعدي قدام العربية ومبقاش منتبه يقف لغاية ما ابصلة وابدلة التحية علشان يكمل مشوارة .


أجمل حاجة في راجل دة أن ابتسامته معدية أول ما يسلم على حد تلاقية بيبتسم هو كمان من غير ما يحس

بعد فترة بقيت لما أشوفه تجيلي أفكار كتير يعني أية اللي يخلي راجل كبير في سنه ينزل بدري قوي كده بيهرب من وحدة ولا عنده نظام مثلا متعود عليه ولا مضطر ينزل يقضي طلابته بنفسه لأن عمري ما شفت معاه حد كل يوم أتخيل حاجة شكل

بس رؤيته في حد ذاتها بقت بتعملي تفاؤل وأقول في سري الحمد لله أن لسه في حد بشوش كده وغصب عني ألاقي نفسي بفكر ازاي بيعرف يحافظ على الابتسامة دي

الأسبوع اللي فات بدأ نفس البداية بنفس السيناريو إلا حاجة واحدة لما عدى الراجل ده كان باصص في الأرض و ما سلمش على حد وهو ماشي

واختفت من على وشه الابتسامة الهادئة الجميلة و مكنها ظهر حزن عميق حولت أقلة صباح الخير لكنه لم ينتبه ليا وكمل طريقة ومن يومها ما شفتوش تاني :(

25 comments:

MarwaAshraf said...

صعب أوي ومش حقدر أقول أكتر من كده

شيرين said...

هو صحيح صباح بنفس التفاصيل، بس كل تفصيلة فييها جمال غير طبيعي مش بنحس بيه غير لما بنفقده.. بالظبط كده زي ما افتقدتي الراجل العجوز صاحب الابتسامة...

متيجي نستمتع بتفاصيلنا المفرحة، مين عارف الزمن شايل لنا أحلى منها ولا إيه...

Ajnadeen said...

جميلة جدا قصص صباحك يا سلمى :) رغم هذا الحزن العميق الذي غمر بشاشة الرجل فجأة..
أتمنى أن تعود له ابتسامته التي لا شك تضفي الجمال على صباح من يرونه..

Ahmed Al-Sabbagh said...

الصديقة العزيزة
سلمى

البوست ده من الروعة

اللى تخلى الواحد يقرا ويستمتع ويعيش الكلمات ويسكت

:)

تحياتى

بطوط حبوب said...

حلو اوى البوست ده
رغم انه صباح مكرر الا انه مميز بجد
ورغم انه مكرر الا انك قدرتى تحسى باحاسيس الناس الى حواليكى الى المفروض اصابك املل منهم بجد عجبنى اوى
وصباحك فل

SKOBL- Little Lazy Me said...

بيتهيألي ساعات حييجي يوم و الناس في مصر كلها تفقد خاصية الابتسام من اللي بيحصلها .. هو اللي بيحصلنا شويه

Unknown said...

سلمى ياريت تطمنينا أول ما الراجل يظهر تانى وأول ما يرجع يبتسم من تانى

Nagy said...

جميل يا سلمي طريقتك في الكتابة... ايه رأيك يا شيرين .

العجيب يا سلمي بالرغم من كل اللي حكيتيه في أول اللمسة ان آخرها بيثبت ان التغيير هو الحقيقة الوحيدة الثابته في حياتنا

Anonymous said...

سمسمتي الغالية بجد عجبني قوي صباحك عل يالرغم من ان الاحداث بتكرر علي حد قولك بس عند تغيير اي حدث منهم بيغييرك انتي كمان انا اتاثرت جد لما قولت ان الراجل الابتسامة راحت من علي وشه يارب يكون بخير .
انتي عارفه اني لما يبقي حد باشوفه كل يوم لو يوم من شوفته احس اني لازم اروح اشوف ليه هو مش ظهر يمكن شعوري غريب عندي
ربنا يسعدك دوما يا سمسمتي

weswes said...

سلمى البوست التفصيل اللى فيه حنونه جدا
تحس انها ممكن اى حد يكون بيعيشها كل يوم من غير ما يلتفت ليها
وبيتى وبينك انا لو مكانك ولقت عمو الطيب ده زعلان كده كنت اكيد هسئله
تحياتى لكى

arsenalwy said...

ياحرام

طب امانة عليكى لو شفتية تبقى تطمنينى


شكرا و على راحتى

صاحب المضيفة said...

حياتنا غالبا سيناريو بيتكرر كل يوم بنفس الطريقة علشان احنا مش بنفكر نغيرها


ياريت كل واحد فينا يحاول يغير حياته ويلونها بلون الطاعات

ساعتها هايحس ان الدنيا كلها في ايديه



مدونة جميلة ورايقة وأول مرة أزورها


تحياتي

عروس البحر said...

عاشرة من عاشرة
حفظتي كويس
فولل مارك

قضية عم أحمد Ahmed Case said...

هههههههههههههههه

أصل نقريبا ده بيحصل معايا كتير
بس فعلا بحاول كل يوم استشعر معني او حاجه جديدة ....

بس لو انت معملتيش ايدت في الحياة هتفضلى عايشة في كوبى وبيست

نحن من نصنع الحياة ولا تصنعنا ...

Unknown said...

اخى الفاضل -- اختى الفاضلة
ادعوكم للتضامن مع دعوة الداعية الاسلامى الكبير ( عمرو خالد )والانضمام
------ الى ----

( حملة حما يه )
فى انتظاركم ولاتترددوا نحن فى حاجة اليكم
برجاء التواصل للمساهمة وشكرا لكم مقدما....للمزيد يمكنك زيارة مدونتى
او زيارة موقع عمرو خالد مباشرة

Salma Amer said...

أصدقائي الأعزاء
حبيت أن أنقل لكم حدث هام حدث هذا الصباح :
منذ عدة أسابيع يبدأ يومي نفس البداية ما عدا ابتسامة هذا الرجل الذي لا اعرفه
إلا هذا الصباح وانا بفحص مياه العربية جاءني صوت طيب :
"صباح الفل والياسمين "
ألتفت سريعا لأراه أمامي بهذه الابتسامة التي افتقدتها منذ عدة أسابيع
وتبادل معي حديث قصير عن العربية والاعتناء بها وانه من المهم أن أهتم بالمياه والزيت وخلافة في العربية علشان أضمن سلامتي في الطريق ثم مضى في طريقة قبل أن أجد فرصة ان أسئلة أي سؤال
بيني وبين نفسي قلت فرصة أستفسر عن هوية هذا الرجل فسألت عم نبيل الرجل الذي يمسح لي العربية
قلتله :
انت تعرف الحاج اللي سلم علينا من شوية وخصوصا اني بشوفك بتقف تكلم معاه الصبح كتير
رد عليا لا واللهي يا أستاذة أنا حتى معرفش اسمة بس هو تقريبا ساكن في الشارع اللي ورانا بس أصلة متعود يسلم على ناس في الشارع كل يوم ودايما بتقلية مبتسم كده
تعرفي يا أستاذة تقريبا دة الوحيد اللي بشوفة بيضحك دايما الصبح كده أصل الناس بقى خلقها ضيق ومحدش بيفكر يرمي حتى السلام على الصبح تفتكري ليه ناس اتغيريت كده
بس اضطريت انهي المناقشة علشان كنت حتأخر على الشغل وخصوصا أني موصلتش لمعلومة ولكن بيني وبين نفسي شعرت براحة غريبة لعودة الابتسامة

Unknown said...

طب الحمد لله يا سيما ربنا يدمها عليه و عليكي و علي الناس كلها يا رب

Unknown said...

حمد الله على سلمته يا سلمى
ومتنسيش المره الجية تعرفلنا الله يخليكى مين عم الحاج ده

شيرين said...

لااااااااااا بجد ظهر تاني ؟!!! مش عارفة ليه فرحت كده لما قلتي انك شفتيه تاني.. ابقي سلميلنا عليه
:)

Omar said...

المفروض تسألي عليه في أي مكان

MarwaAshraf said...

هيييييييييييييييييييه

ظهر تاني .. ياألف نهار أبيض .. يا ألف نهار مبروك.. مش قولك حيرجع

والنبي يا سلمى كل لما تشوفيه ابتسمي مرتين

مرة ليكي ومرة ليه

تحياتي

♥ BaToOoT ♥ said...

مش عارفه بجد فعلن صعبه اوى
انك لما تتعودى على ابتسامته تفقديها بدون اى مقدامات
اتخدت اوى وقلبى انقبض
عارفه زى ما يكون حد فقدتيه كده بدون مقدمات
بتبقى صدمه صعبه اوووووى
حتى لم اطمنت انك شفتيه تانى ورجع بابتسامته
مش مطمنه
بخااااااف اوى من الفقدان والبعد
عشانه احساس صعب اوى
بس عارفه حاولى تكلميه اكتر شويه
ولو غاب بابتسامته اللى محفوره جوه قلوب كل الناس اللى بيهديهم ابتسامته على الصبح
مش تسيبى الامور ماشيه عادى كان شيئا لم يكن
بجد دورى عليه اعمليله حاجه
..
اسلوبك فوق الراائع ياسلمى
انا اول مره اجى لك
ربنا يوفقكى ويحميكى ويسعدك
ومش يخلى حد يحس باحساس الفقدان من شخص او مجرد حتى شئ بسيط بس بيفرق
تحيااااااتى
بطوطة

Soooo said...

في ناس كتير قوي بتلاقيهم بيحاربو عشان يزرعو الابتسامه والضحك في وشوش الناس
بالرغم من كتر الهم والغم اللي عايشينه

والحمدلله ان الراجل ده ظهر عالساحه من جديد



سلاموووووووووووز

MariumaZ said...

أكيد الرجل العجوز ده عرف إنه مريض أو حد من أقاربه مريض... أو ممكن يكون توفاه الله... بالرغم من إن جميع السيناريوهات حزينة ومؤسفة إلا إن دي الحقيقة

أنا جدي الله يرحمه كان متعود دايماً ينزل كل يوم الصبح بدري يشتري الجرنال والعيش وطلبات ولما تعب وقعد في البيت وبعدين توفاه الله... كل الناس سألت عليه لأنها كانت متعودة إنه ينزل كل يوم ويصبح عليهم

أما بالنسبة للتفاصيل اليومية اللي بتقابل الواحد وهو نازل كل يوم الصبح بدري.. فأنا بصراحة مش فاكرة غير أيام المدرسة الصبح... نفس الناس نازلة... نفس الراجل اللي بيعدي يحدف الجرايد في البلكونات... نفس الأغاني ونفس برامج الراديو وصباح الخير يا مصر والليلة دي كلها
لكن دلوقتي ما بحسش بأي تكرار .. كل يوم بنزل فيه حتى لو في نفس الميعاد... مختلف عن اليوم اللي قبله

MariumaZ said...

أنا مبسوطة جداً إن الراجل ده رجع... والله لازم تتعرفي عليه يا سلمى.. هو بقى فيه حد بيضحك ويبتسم في الزمن ده... بجد ده شخص نادر الوجود
رجل من الزمن الجميل