Friday, June 6, 2008

ليه ؟ مجرد سؤال

بعد الشغل قضيت يوم لطيف قبلت صحابي في سيتي ستار مول ودخلت السينما مع صحبتي وروح قلبي شيرين وكان يوم لذيذ كسر روتين الحياة. وبعدين اتفرجنا شوية على المحلات وفجأة شيرين وقفت قدام محل وعجبها بلوزة ستان قلنا ندخل نسأل بكام عادي يعني
أول مادخلنا المحل ملقيناش فيه غيرنا وغير الناس اللي بتشتغل فيه ودة قلقنا شوية بس ده مامنعناش أننا نسأل السؤال
من فضلك البلوزة اللي في الفترينة بره اللي بحزام ستان بكام ؟
ردت البنت علينا هو الحزام مش بتاعها احنا اللي حطينة عليها بس لو حتشتريها حنديهولك مع البلوزة مفيش مشكلة
طيب ممتاز وكررنا السؤال بكام ؟
رد علينا بقى المرة دي الراجل اللي واقف مسك البلوزة يفرجها لينا وقال بس هي غلية شوية ؟
راحت شيرين مكررة السؤال يعني بكام ؟
راح الراجل ووشة مشرق بابتسامة عريضة رد وقال سعرها
ساعتها أضيقت قلت في نفسي ياخسارة يا سلمى كنت كويسة بقى بيجيلك هلاوس سمعية وأنت واقفة كله من كتر اقعدتك قدام مسعود ( للتوضيح دة لاب توب الشغل ) بالعشر ساعات كان بدري عليكي ما فوقنيش غير صوت شيرين وهي بتقول للراجل حضرتك معلش بتقول 7000 جنية قلها لأ 7300 جنية ( سبعة ألاف وثلاثمائة جنيه ده بس للتأكيد أنك قرأت الرقم صح )
طبعا أنا دخلت من مرحلة الهلاوس إلى مرحلة الصدمة وبدأت افتكر جدول الضرب والطرح علشان أحاول افهم الرقم وبصعوبة ما عرفتش أجمع غير كلمة واحدة
لية ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
رد بهدوء أصلها من ألمانيا
يا سلام سلم كدة بقى أداني المبرر اللي حيخلينا نقتنع بسعرها والمصيبة أنها من غير حزام كمان كانوا حيدوه لينا هدية
شيرين كان لسة عندها القدرة انها تتكلم فضحكت بسخرية وقالت له إن شاء الله حنعمل جمعية ونجيلك
أنا مش عرفة هل ممكن يكون في حد بيشتري بالسعر ده وبعدين انا لسة عندي مشكلة محدش جاوب على سؤالي
لية ؟
وعلشان تحاولوا تجابوا على السؤال صورتلكم البلوزة







39 comments:

RAMA said...

يععععععععععععع

أوه مامي .. بلوزة قميئة موت... على فكرة أنا حاولت ارد على السؤال ومش عرفت بس اللي اعرفه ان اللي يبيع هادوم أي كان نوعها بسعر زي ده واللي يشتري هادوم اي كان نوعها بسعر زي ده بيطلق عليهم حاجة واحدة بس ... الاستعباط الإنساني

ربنا يحمينا منه

سلام يا سلمتي

Camellia Hussein said...

بصي أنا لو مكانك أكيد كنت همشي من المحل ده بسرعة عشان ما قلش لفظة ابيحة
آه يا مرارتي ياااااااااااااني

سمر الشافعى said...

هههههههه بصى يااوختشى انتى تردى عليه بكل الاطه وتقوليلو او لالالالالا 7 الالاف بس دى مش من مستوايا خااااالص ياشيرى اوريفواااااااار

بس بجد انتى اللى غلطانه ايه اللى يوديكى المناطق دى يابنتى دى للفرجه بس مش عقلك وشيطانك يوزوكى ويخلوكى تسالى عالسعر اهو انتى اللى جبتيه لنفسك

battot said...

سبعة الاف جنيه
لا اله الا الله
دي ممكن نشترى البلوزة دي انا وعادل ونحطها مكان اوضة النوووم
وهو يبقى تغيير وخروج على المألوف

بس انا عايزاكي يا سلومة تشرحيلي بالظبط فين المحل ده واسمو ايه ضروري بسرعة

صاحب المضيفة said...

هههههههههههههههههه

دي بس وبالمبلغ ده

ومال لو طويلة شوية كان قال ايه المحروس


ربنا يستر علينا وعلى مصر فعلا



ولا يهمك صحيح


اعملي الجمعية وأمرها هين خالص



تحياتي

علي عبد المنعم said...
This comment has been removed by the author.
علي عبد المنعم said...

طب ما كنتوا جبتوا الحزام

مصـ( الخير )ـعب said...

أضم صوتي لصوت علي وأطالب بالحزام!

Hamza said...

بلوزة ب 7000 جنيه ده عادي

ممكن يكون الترزي اللي مفصلها نادر ومافيش منه
او نوعية القماش جايبنها من الفضاء الخارجي او مستوردة من كوكب تاني

بلاش افتراء على الناس وخلوا الناس تاكل عيش

sameh said...

يا سلمى أنت مش وخده بالك كويس
البلوزه والحزام ب300 جنية الشنطه هى يا ستى إلى ب7000 جنيه

خلتونا بس نغلط فى الراجل ونقول عليه تييييييييت

Anonymous said...

هو متوقع أكيد أن البلوزة بهاا عددة مميزات هنعرفها مع بعض وهى
1- الحزام المرفق هو مش حزام عادى هو اكيد حزام تخسيس
2- القماش محقون بالفريون مما يجعل الجسم لا يشعر بحرارة الجو
3- بها جهاز معطر مما يجعل رائحة البلوزة دائما جميلة
4- تكتسب اشعة الشمس بالنهار وتضئ بالليل
5- فيها ميزة اخرى انها ضد الرصاص

هشام الصاوي

Anonymous said...

عادى عادى
يا سلمى
انا بقة اضم صوتى لصوت سامح
واقول

تيييييييييييييييييييييييييييييييييت
كوثر

Wish I were a Butterfly ... said...

:)
عرفتي ليه كانوا بيدوكي مقدمات قبل ما يقولوا السعر يا سلمى؟؟ هم فهموا إنكم ناس مش من النوع المجانيني اللي ممكن يشتري بجد منهم
هي المشكلة بكل بساطة إن فئة من الناس بتتجنن في رفع الأسعار... بس بيلاقوا فئة يشتروا منهم ويثبتوا إن الجنون و الهبل دي أعراض عادية جدا ومقبولة في مصر
بجد.... يعني هو طول مافيه ناس بتشتري منهم، هم مش هيكون عندهم مشاكل

و بعدين يابنتي احمدي ربنا:). اختي برده مرة غلطت الغلطة الصعبة ديوسألت على شنطة "صغيرة أوي".. وطلعت بنفس السعر:) احمدي ربنا انها بلوزة
ربنا يستر على بلدنا الأيام الجاية..معلش يا لومي
:)

Anonymous said...

آدي آخرة اللي يمشي مع شيرين ... مانابك غير إنك عكرتي دمك ع الفاضي

مش عارفة لية لما قالك انها من المانيا وبعدين خبطك بسرعها ...جت في بالي فكرة ... مش يمكن البلوزة دي لبستها " المزة" بتاعت هتلر قبل كده .. فبقت من التراث الألماني.... وارد برضو

Tarek said...

غريبة أوي
أصل شكلها كده أخرها 7200 خنيه
لكن 7300 كتير قوي

Ajnadeen said...

دا اللي اسمو الاستعباااااط
بجد أنا بحس ان الناس دي بتستعبط وبتصدق نفسها
وعارفة المشكلة ان مفيش حد بيلمهم..
عموما ربنا يهدي ويكمل الناس بعقلها

شيرين said...

يااااه يا سلمى كل دي ناس دخلت وعلقت قبلي.. معلش أصلي كنت في غيبوبة ولسة مفقتش منها من ساعة ما سمعت سعر البلوز الفضائية.. انتي عارفة يا أختي أنا لما بسمع رقم أكبر من خمس آلاف بتجيلي حالة عصبية.

المهم بذمتك ايه رأيك في البلوز الروعة اللي أنا اشتريتها ب 49 جنيه.. مش تجنن

:)

Nour-Gedeed said...

السلاموا عليكوا
ازيك يا سلمى
طبعا مستغربة اني بتكلم بعشم
بس ده لسببين
الاول : ان مدونتك جميلة اوي على فكرة قلما بدخل عند حد و اعلق من اول مرة
بس مش عشان انا عبقرية
مدونتك جميلة بجد و الله
الثاني : ان اسمي سلمى برده
فاتبسطت بصراحة انك اسمك سلمى
بالنوسبة بأه للبلوزة
ففعلا نفس السؤال كنت بسأله يعني هقولك حاجة
مرة واحدة قريبتي جوزها ماشاء الله واصل كده
هي من النوع اللي بيشتري الحاجات دي
بس مرة برده لقينا حاجة زي كده لقيتها بمنتهى البراءة : لأ طبعا انا مشتريش حاجة زي كده هو اسراف و لا ايه
قلت : طب يا شاطرة بلوزتك اللي لبسها دلوقتي بكام كانت ب 2000
يا سلام سلم بجد
ايه التوفير ده

Nour-Gedeed said...

اه صحيح كان في اقتراح كده من الست الوالدة
ممكن تطلع موضة للعرسان
يجيبوا الشبكة بلوزتين من دول

من اول لمسه said...

حاجه تجيب المرارة

أحمد رفعت said...

هو عيد ميلادك الجاي امته
أصل انا عجبتني بلوزة حلوة اوي من المنيا

إيمان الميهي said...

هي حاجات سيتي ستارز غالية يا سلمى
عارفة ؟
أنا صاحبتي قالت لي انه فيه جاكت سهرة هناك بـ 15000 جنيه
وكل فوله ولها كيال
السؤال بقى : تفتكري الحزام لوحده بكام ؟؟
فكرتيني بمسرحية المتزوجون لما بتقوله : القفص فاضي بـ 15 جنيه
ملحوظة على جنب : بتعجبني بوستاتك وطريقة كتابتك وروحك أوي أوي يا سلمى
كل الحب

Dalia Hassanin said...

والله أجابة سؤالك ده كلمة واحدة بس
عته بعيد عنك ..
أنا مرة حد أعرفه حكالي عن واحد صاحبة كان نفسه في 7000 جنيه عشان يتجوز بيهم... 7000 جنية يحلوله كل مشاكله في الحياة ... يأجر أوضه فوق سطوح ويفرشها ويتجوز فيها .. وناس تانية بتشتري بلوزة بالــ 7000 جنية دول...

كلام على بلاطة said...

اذا كان التمن ب 7300 جنيه
يبقى الفرجه بكام
ولمين وازاى
تحياتى

كلام على بلاطة said...

اذا كان التمن ب 7300 جنيه
يبقى الفرجه بكام
ولمين وازاى
تحياتى

HERO said...

بس ؟؟؟7300 جنيه بس ؟ يابلاش والله
هه دنيا
يعني مثلا اللي هتشتري البلوزة دي ب 7300 جنيه يبقى هتشتري مثلا جيبة ب 10000 جنيه وشنطة ب 3000 جنيه ومثلا هتحط perfume ب 2000 جنيه وتركب عربية ب 10000000 جنيه
والله رخيصة ممكن يعني مش غالية قوي
والناس دي موجودة على فكرة
ربنا معاكي

تحياتي

Minus said...

:D

إعتقد إن مسعود نفسه ارخص من البلوزه

:-]

.:.-=- ELGaZaLy-=-.:. said...

ههههههههههههههههههههههه


فى وفى اغلى من كدة كمان والاكادة ان فى ناس كتير بتشترى...وفى ناس بتاكل بقلاوة من وراء الشغل دة

المهم اعصابك بخير.؟؟ حديد
فى واحد صاحبى لسة امبارح واخدنى علشان نجيب شوية حجات ملهاش اى لازمة من عينة شبشب منة فية نظارة لزوم البحر الى مش بيروحة اصلا لانة بيخاف من المياة
واشياء اخرى تقريبا حساب اليوم كان 10000 جنية...واحنا ماشيين بيقولى مالك ساكت لية قولتلة لا عادى ..قالى لا شكلك مضايق ...بس وطبعا اكيد متوقعة انا قولتلة اية
...هو حاليا بيعيد حسباتة فى انة يعرفنى اساسا

zOzO said...

هههههههههه
ههههههههههههههههه


مش عارفه اقولك ايه بجد
بلوزه بالمبلغ ده

بس تعرفي
مين بيشري الحاجات دي
الاود السلطه ف مصر ايه يعني بلوزه بالمبلغ ده
لو اقل من كده تبقي مش حلوه
امال يصرفوا فلوسهم الكتيره دي فين ؟
دا انتي غريبه اوي
ههههههههههههههههههههه


تحياتي ليكي علي البوست
تسلم ايديكي
دي اول زياره
ومن الواضح انها مش الاخيره

zOzO said...

بس ممكن كانو هيعطوكي
البلوزه ومعاها الماليكان
وايديها كان فيها خاتم دهب ممكن

انتي اكيد مش خدتي بالك ظلمتي الناس
هههههههههههههههههههههههههه
سوري اخدت تعليقين
بس من فقعتي

Bongo said...

لأ بصراحة البلوزة تستاهل ..

و بعدين مش كفاية هيدوكي الحزام هدية ؟!

كتر خيرهم يعني

أفترااا

wafaa said...

هوا الراجل جاله قلب يقول 7000 جنيه ازاى ؟؟
عادى كده ؟ مشاعر اللى هيسمعه مالهاش حساب ؟؟
قوللى بس انتى اسم المحل

Mariam said...

سلمى الجميلة ... أحب أقولك إني قريت البوست ده من ساعة ما كتبتيه ومكنش عندي الوقت أعلق... ولو إني قلت لك تعليقي في وشك على طول لكن معنديش مانع أعيده تاني وأزيد فيه كمان

بصي يا ستي... أولاً كان لازم تذكري اسم المحل طبعاً وهو
Escada
وده بيت أزياء شهير جداً وغالي جداً في فرنسا بيعمل ملابس وبينتج عطور يعني زي
Chanel
كده... لو كنتي سألتيني الأول كنت شديتك من إيدك وقلت لك إوعي تدخلي.... يسر يا بنتي لما راحت وسألت على بدلة سادة وبسيطة خالص وصباحية كمان ما تتلبسش بالليل... قالولها دي كانت ب17 ألف وبقت ب15 ألف بعد الخصم

أنا لو في يوم من الأيام ربنا فتح عليا من واسعة وبقيت غنية مووووت وعندي كام فيللا وشاليه في الساحل وكام بيت في القاهرة على حبة مصانع كده... وحياة الغاليين ما اشتري بلوزة بالسعر ده... والله أخاف من حساب ربنا... ساعتها ممكن أشتري بلوزة بألفين دي لو كانت مالهاش حل يعني أو آخد ال7300 جنيه دول أساعد بيهم حد بيتجوز أو أشتري لبس يكفي 3 أو 4 أسر بحالهم

المهم يا ستي... فيه بعض المحلات اللي فتحت في سيتي ستارز وموجهة كده للأمراء والخلايجة والأغنياء بتخلف اللي بينزلوا مصر وعندهم هوس الماركات السينيه الفظيعة... يعني لا مؤاخذة دي حتى مش موجهة للأغنياء بتوعنا.. على سبيل المثال الماركات وبيوت الأزياء دي لو شفتيها بجد بجد متفكريش تتدخليها زي
Valentino
Givenchy
Yves saint Laurent
Dior
Chanel
وطبعاً بيفرق أوي وبيبان من برة إذا كان ده فعلاً بيت الأزياء ولا مجرد محل عادي مقلب الإسم ومتمسح فيه

ما تبقوش تعملوا شوبنج من غيري بعد كده يا حلوة علشان ما تقعوش في الأخطاء الفادحة دي

إلا صحيح فين الحزام... أضم صوتي لصوت علي ومصعب وأطالب بالحزام

قلوب حائرة said...

بصي ياسلمى ايل نازل عليا ضحك وخلاص مش عارفة مالي بس انا اساسا مقدش اشتري حاجة بعشر الرقم ده انا بتصور لو اني كنت في موقفك كانت علامات الددهشة هتبان عليا والمثلة في بحلقة العينين وفتح البوق ودلدلت الشفايف وربنا ما يوريكي بعد كده يا لا فوتك بعافية

ebtsama 7ayah said...

مش مشكله الواحد يجيبالبلوزه دى ويعملها دولاب مخصوص من الكريستال ويحطها تحفه عنده فالبيت الناس تتفرج عليها لان ساعتها خساره تتلبس

blue-wave said...

يا نهار ابيض؟
الله يكون فى عونكم وقتها
انا لو منكم كنت شمعت المحل:)

mohamed said...

لو حسبتم سعرها بالدولار مكنش حد استغرب ولا كان البوست ده اتكتب اصلا يا جماعة ده شكله فستان ومستورد كمان ومن المانيا مش من الصين اللى ربنا يخليهالنا كلنا ونشترى بضايعها الرخيصة تفتكروا فستان زى كده هيقل عن الف دولار مستحيل طبعا لكن لما نحول جنيه مصرى ونضيف مكسب المحل واجرة الموول طبعا هيوصل لسبعة الاف ونتخض ونسورق الموضوع ببساطة محدش يسأل على عربية لامبورجينى ويقول يا لهوى وهو قدامه 128

ساسو said...

والله ده اسمه استعباط
الوقتي اللي نفسه ينتحر ينزل يشتري هدوم يجيله سكته قلبيه ويبقي مات موتة ربنا
بجد حاجه تحرق الدم
طيب ده قالك انها من المانيا
انا رحت اشتري جيبه قصات وعاديه خالص ومفيهاش حاجه
قالي ب350
هو السعر مش كتير بالنسبه للرقم اللي انتي قولتيه
وسألت زيك ليه..؟
رد عليه وقالي اصلها من الصين
الصين اللي اي حاجه رخيصه او اي كلام كنا نقول اصل صيني
بزمتكم مش حاجه تحرق الدم
اسفه طولت عليكم

وحـــــــــــى القلم said...

ايه ده يا بنتى ده انا اشتر دسته منهم كل الالوان انتى فاكره ايه يعنى :-)
الحمد لله على سلامتك احمدى ربنا ان مرارتك متفقعتش ساعتها