Thursday, October 25, 2007

رسالة إلى طفلة....لا تتركيني وحدي



جوايا طفلة صغيرة شقية وعندية عايزة تلعب وتنطط بتحب الحياة قوي ولما تفرح بتفرح بجد من قلبها ولما تزعل بتزعل قوي تعباني معها وبتعبها معايا يعني أحنا الاثنين تعبين بعض طول الوقت

تعباني معها لأنها بتثق في ناس وبترفض تشوف كدبهم وغشهم ورغم أنها في كل مرة بتتجرح و بتتوجع وتتألم إلا أنها مابتحرمش

بتتصرف على طبيعتها مع الناس من غير ما تفكر مابتسمعش كلامي لما اقلها أن الناس مش عيزه كده مش عيزه الوضوح والصراحة أو بمعنى أصح مش بتفهمهم لأنهم معذورين برده من كتر ما بقت حياتنا رمادي ما بقوش يعرفوا الأبيض من الأسود بقى عندهم عمى ألوان بقوا يصدقوا الكدب ويكدبوا الصدق

بتعبها معايا لأننا حاسة أننا بخنقها جويا مش بهتم بيها بانساها ساعات وسط الضغوط والمشاكل اليومية بالرغم من أننا محتاجها قوي لأنها هي اللي بتصبرني وتقلي أن بكرة حيكون احسن أكيد

هي كمان اللي بتمنعني أن أتغير لأننا مقتنعة أن الناس بتخسر نفسها في اليوم اللي بتخسر فيه الطفل البرئ اللي جواها
علشان كده بقلها ماتزعليش مني إني كتير بنساكي بس عذري أن احيانا بتكون ضغوط وهموم الحياة اقوى مني استحمليني ماتسيبنيش في يوم من الأيام لأنك بالنسبة ليا طوق النجاة علشان التيار ما يسحبنيش واغرق في بحر الحياة

13 comments:

Unknown said...

بدات اكتشف إن المدونات دي مكنة إنسانية أوي، بتخللي الناس تطلع الحاجات الحلوة اللي جواها، تعرف يا سلمى، أجمل ما فيكي، إنك صافية، صافية بشكل أجمل من كده مفيش، ساعات لما بأشوف الناس اللي زيك كده، بأقعده أقول ياربي هما أهلهم ربوهم إزاي، يعني ممكن الواحد يعمل ايه في عياله، علشان يطلع ناس للدنيا زيك كده، مش محتاجين يتجملوا علشان خاطر الناس ترضى عليهم أو ماترضى عليهم، ولا محتاجين يكدبو علشان خاطر الناس ينبسطو منهم، عاوزة الحقيقة احنا محتاجين ناس زيك كده في كل حتة، علشان تبقى نظيفة كده، يا بنت الايه يا جميلة
تعبتيني بالمقال ده، خاصة إن العيل عندي ناطط أدام عيني زي العفريت اليومين دول، بس عيل شقي ولسانه طويل أما الطفلة اللي جواكي، فأكيد أكيد، متربية .. لسة جميلة يا توتة

دوللي said...

حبيبتي سلمى
بجد بوستك دي جه على الجرح
كلنا جوانا الطفل البرئ دا وكلنا كتير اوي بنكون بعيد عنه وساعات قاسيين عليه
ب صدقيني يا سلمى الطفل اللي جوانا دا كير اوي بيخفف عنا متاعب وهموم الحياة لما تحسي انها خلاص خلتك تجيبي اخرك
وساعتها بتسيبي نفسك للطفل اللي جواكي وبعدها بتكوني احسن
اما موضوع انها بتتعبك اوي علشان بتعامل الناس على طبيعتها والناس متكنش بتحب كده او مينفعش تتعامل بالطريقة دي دا غصب عنها لانها بتكون صافية ونقية اوي ومينفعش تتعكر علشان ترضي او تعرف تتعامل مع الناس بس المهم انك تحاولي تحميها على اد ما تقدري من اي غدر او جرح من الناس
بس انا اعتقد ان في الحياة من بداخلهم نفس الطفل وساعتها هتلاقي حد زيك ومش هتحتاجي تلومي عليها او تعذبيها بانها متكنش على طبيعتها
سوري التعليق طويل بس كلامك حسته اوي

Lens Geek said...

فكرتيني بايام مكانت كل حاجه جديده

فكرتيني بايام لما كان الواحد بيكتشف العالم برجليه الصغيره و عيونه الواسعه

فكرتيني بايام لما كانت الناس عمالقة و الواحد قصير قوي

فكرتيني بايام لما كان الواحد لا يملك الا البرءة للدفاع عن نفسه

Иεşċąfě &иεmö said...

مش عارفه ئئولك ايه غير ان احنا لما بنفتكر الطفل الي جوانا الناس بتعايرنا و لما بنكتمه اجمل حاجه فينا بتوه اجمل بسمه ممكن تشوفيه بتكون علي الطفل انا مقتنه ان عالم الكبار ده عالم الكدب و نفاق عالم تحسي انه ملئ بالغبار عالم كئيب انما العالم الصافي و البهيج ملينا بالنور الصافي و الخضره هو عالم الاطفال الي جوانا بس المشكله ان محديش عاوز يسبنا نعيش في العالمده زي ما يكون احنا لازم ندفع ضريبه ان احنا بنكبر و هي ان احنا بئتل الطفل الي جوانا انا مقتنعه اني لازم اتحدي الناس كلها و اسيب الطفله الي جوايا تعيش مش مهم انجرح جرح الاطفال بيداوا بسرعه و مش بيسيب اثر انما جرح الكبار هو الي صعب يداوي و ديما بيسيب اثر جامد في مقوله بتؤل ان الواحد و هو في بطن امه بيئضي ال9شهوربحاول يخرج للدنيا و بعد كده بيئضي عمرة كله بيحاول يرجع تاني يا ريتك يا طفله ما تسبيناش

habiba said...

يااااااااااا صباح الناس الكئيبة الي بترد عليكي يا سلومة يا بنتي الصغيرة الجميلة الحلوة

مين دول؟؟؟؟ الكئيبة الي اسمها نسكافيه دي مالها عاملة كده ليه؟؟ والنبي يا سلومة بلاش الناس دب ترد عليكي علشان بس البلوج الجميل الطاهر ده ميبقاش كئيب كده
بصي يا قطتي
كل سن ليه جماله وصفائة ورونقة
مش الاطفال بس هو الي صافيين وأنقياء
انتي كمان كده وناس كتير زيك وأكتر منك كمان وسعداء بالنقاء ده وعايشين بيه وليه ومعندهمش أي استعداد للتغير لأنه هو الصح وأوعي تصدقي حد يقولك غير كده ولازم تتغيري
عارفة ماما بتقولي ايه؟؟ أوعي تتوقعي من الناس يعاملوكي زي ما بتعمليهم .. عارفة لو تعاملتي بطبيعتك الحلوة الجميلة دي واحتسبتي كل افعالك لله رب العالمين ولا تنتظري اي مقابل من حد صدقيني عمرك ما هتزعلي ولا تضايقي لأن في الآخر انتي الكسبانة دنيا وآخرة ... فاهماني يا قطة
وانتي بجد مش مجاملة أجمل طفلة في العشرينات شفتها في حياتي وكل حاجة فيكي بتصرخ بكده وأولهم إيدك الصغيرة الجميلة الي زي العرايس اللعبة :) بعاكسك طبعا.

بحبك أوي وأوعي تتغيري أنا بقولك أهو

سندباد said...

جميل اوي المعني اللي في البوست
سعيد باكتشافي مدونتك
تحياتي

Anonymous said...

أوعي تفرطي في الطفلة اللي جواكي .. لأنك حتتعبي قوي من غيرها .. هي اللي بتخلي الحياه أحلى وليها طعم تاني .. أوعي الناس تخليكي تتخلي عنها .. أكيد في ناس زيك زيها ولما تقابليهم حتعيشي أيام مفيش أحلى منها :)

قلبي على ولدي انفطر ،سلط ولدي عليا هاكر said...

زماااااااااااااااان وانا صغير ..كنت بحلم أبقى كبير
تعب القلب واتحير من الدنيا وم المشاوير
الحلم كان بريء مفروش بالورود
والقلب كان بريء مليان بالوعود
ولما كبرت قلت ياريت ما كنت حلمت ولا
اتمنيت
وقلت ياريتني فضلت صغير زي زمان
ربنا يسامحك يا سلمى قلبتي علينا المواجع
ناجي حسين

MarwaAshraf said...

عارفة يا سلمى كأنك بتتكلمي على صابحتك راما .. والرسالة دي أنا قرأتها ليها كلها علشان هي فعلا محتاجة كل كلمة فيها

وكمان عاوزها أقولها : ياراما يا صغنونة ياللي جوايا أنا بحبك أوي وبحب كل الناس اللي شبهك وبتفكرني بيكي

:D:D:D:DD:

ــــــــــــــــــــــــــ

بجد يا سلمى .. أبدعت

Anonymous said...

اه يا سمستي الجميلة لما تبدعي وانتي دائما مبدعة بجد انا نفسي طفلتي الدلوعة اللي جوايا اقولها اكبري مش تحرجيني ادام الناس لانها بتظهر بشكل طفولي
بس بيني وبينها اقولها اضحكي والعبي ده انتي اللي مخلية الحياة حلوة مش كل الناس بتفنن في خداع الناس
باحبك يا سمسمة وفعلا فنانة وطفلة جميلة قوي وبريئة وصافية ربنا يبارك فيكي يارب
عارفه امبارح نزلت اغنية مع اني خشب في خشب بتاعت صفاء ابو السعود فرحت قوي وفكرتني باحلي ايام

ِِAdem El-Mahdy said...

سلام عليكم و رحمة الله و رحمة الله
بجد بوست جامد
انا اول مرة ادخلى المدونة بتاعتك
و ياريت تقبلينى زائر عليها
ولا
الطفل الصغير اللى جوه الواحد مش لازم يفضل صغير
لازم يكبر
يكون عنده مشاعر و احاسيس و حب و عطاء لكل الناس
لكن مع كبرنا لازم يكبر
علشان ما يعملش صدام
شكرا اوى

www.ademelmahdy.blogspot.com

قضية عم أحمد Ahmed Case said...

بجد انهرده ابداع أوي

بس انا اقولك على حاجه عن سلمى الطيبة سلمى الجدعه سلمى اللى على قد ما بتظلم بحقيقة الحياة بتخلى اللى يتعامل معاها يعرف ان الحياة لسه بخير ..


لو انت طفلة لسه خليكي طفلة ولو جواكي طفلة خلى بالك منها أوي

Soooo said...

ياااه
الحقيقه دي اول مره ادخل المدونه دي
بس شكلي هاتابعها على طول
عشان اسمها ده اولا
وعشان واضح انك انسانه مثقفه وحساسه
والدليل على كلامي انك فعلا جواكي طفله .. والطفل ده هو اللي بيتعامل مع كل حاجه ببرائه تخلينا نحس انه مرهف حسيا وفنيا

نصيحتي ليكي
اوعي تكتمي الطفله اللي جواكي
اتعبيها وسيبيها تتعبك .. احسن ما تقتليها وتقتلي البرائه اللي فيها .. وفيكي انتي كمان



سلاموووووووووز