Wednesday, May 7, 2008

كفاية ماتبسطهاش أكتر من كده



أول ما سمعت موضوع أن العلاوة 30% اللي أصلا أنا مش حستفيد منها بحاجة حطيت أيدي على قلبي وقلت أسترها يارب وقلت لنفسي بلاش تشاؤم بقى يا بنتي يمكن خير وفضلت مستانيه المصيبة وأنتم عارفين وقوع البلا ولا انتظاره
لغاية ما سمعت زيادة البنزين الجنونية وبحكم أن عندي عربية صغنونة بروح بيها الشغل و بقضي مشاويري بيها و ده مش معناه خالص أني من أصحاب الأطيان و لا الأملاك و لازم احط فيها بنزين علشان تمشي وماينفعش مايه للأسف
لذلك أعاني اليومين دول من ارتفاع في ضغط الدم بسبب الفرسة و بوادر اكتئاب مسببة ليا صداع وعدم رغبة في الأكل

وحاسه إحساس عبد السلام النابولسي لما ادلق عليه الملوخية فوق دماغه وهو بيقول كفاية ماتبسطهاش أكتر من كده


28 comments:

Anonymous said...
This comment has been removed by a blog administrator.
menSh said...

واحد يبسط يده "إلينا" بالعلاوات.. وغيره يبسط يده "علينا" بالمصايب والعلق السخنة

Ahmed Yousof said...

إزاى تضرب على قفاك
طبعا كلنا سمعنا عن كتاب "إزاى ما تضربش على قفاك" بس طبعا ما حدش لحق يشوفوا لأن الحكومة سحبته من الأسواق و قرأته و و نفذته علينا
كنت حاسس بنفس احساسك لما سمعت عن العلاوة قبل اضراب 4 مايو و عارف ان ما ينفعش يعمل علاوة تصرف فى اخر شهرين فى السنة المالية و متأكد ان الحداية ما بتحدفش كتاكيت
و لما جاء يوم 4 مايو و الناس فرحت بالعلاوة
كان لازم نضرب على قفانا يوم 5 مايو

شيرين said...

هو مفيش غير ان ربنا هو اللي يبسطها علينا وياخده بقى..

Anonymous said...

على فكرة العربية ممكن تمشي بالماء.

ودي لينك لموضوع عن تشغيل العربية بالماء:
http://spiritofmaat.com/archive/watercar/h20car2.htm
علي فكرة انا وواحد صاحبي جربناالموضوع دا و العربية أشتغلت حوالي دقيقتين :)

Unknown said...

يا سلمى قولي لـ ا/عمر بلاش ينشر موضوع المايه ده لحسن الحكومة تاخد خبر وما نعرفش نشرب المايه بعد كده.
وبعدين انتي مزعلة نفسك ليه كده بصي يا سلمى انتي تبيعي العربية وكل يوم تروحي الشغل من مصر الجديدة للدقي مشي وطبعا انتي عارفة ان المشي رياضة.
شوفتي ياسلمى الحكومة بتاعتنا بتشجع الرياضة ازاي!!

قضية عم أحمد Ahmed Case said...

جيتي على الجرح يا سلمى ...

حيبى الله ونعم الوكيل فديه بلد وديه حكومة ويه كل حاجه
المصريت كرهوا مصر

Иεşċąfě &иεmö said...

كل الالي ئئدر ئئوله حرررررررررررررررررام حسبي الله و نعم الوكيل حرررررررررررررررام

بطوط حبوب said...

ههههههههههههه
اسم العنوان تحفه
دعواتك عشان الامتحانات

صاحب المضيفة said...

انا اول ما سمعت الخبر


ليلتها بالليل وانا نايم قعدت أحلم بكوابيس والله

وقمت الصبح تعبان بشكل فظيع


يارب ارحمنا برحمتك وهون علينا يارب


تحياتي

MariumaZ said...

أنا برضه قلت كده يا سلمى والله أول ما الواحد عرف موضوع العلاوة دي (اللي محدش من عيلتي كلها استفاد بيها)إن الحداية مستحيل تحدف ورك كتكوت حتى... أكيد شوية والدنيا حتولع نار... والحكومة ماشاء الله ماكذبتش خبر... الناس ملحقتش تكمل أسبوع هنا... وده طبعاً يدل عى الغباء السياسي المستفحل
الأجمل من كده إن الحكومة عايشة في دور روبين هود... إحنا بناخد من الأغنياء وندي الفقراء... والأغنياء دول لا مؤاخذة اللي هو إحنا ... هما شايفين إن أي واحد راكب عربية وبيلبس نضيف وعارف ياكل على الأقل يبقى غني مش حاسين إن الواحد بيطفح الدم ويطلع ويدخل من جمعيات على قروض على أقساط علشان يعرف يعيش مستور... لأ كمان ياخدوا ده مننا علشان يلهفوه هما... قال يدوه للفقراء قال... ده اللي اسمه الهبل الرسمي
ربنا ياخدهم ويريحنا يارب هما وريسهم... قادر يا كريم... وافرجها علينا وعلى ولادنا من بعدنا

وبالمناسبة صحيح... العلاوة الرسمية المفروض تكون 15 في المية لأن أصلاً الموظفين بياخدوا علاوة رسمية سنوية 15 في المية... فالزيادة بس 15 وبيضحكوا يا حرام على الشعب الغلبان
الجميل إن حتى تلاتين في المية دول ما يجوش بكتيره أوي خمسين جنيه... حيروحوا على الزيادة اللي حصلت وأكتر بكتير كمان...

wafaa said...
This comment has been removed by the author.
wafaa said...

حسبنا الله ونعم الوكيل ..
والى الاخ ابو يوسف لوعايز كتاب ازاى ماتتضربش على قفاك موجوووود عندى softcopy لو عايزه

--------
تحياتى

Bongo said...

مفيش مدونة مش بتتكلم عن العلاوات و زيادة سعر البنزيين ههههه

ربنا يكون في عوننا و الله


اول زيارة لمدونتك و ان شاء الله مش الأخيرة

تحياتي ليكي

tamer.sala7 said...

طيب ولما عرفتي بأنهم لغو الاعفاءات الضريبة من علي المدارس والجامعات الخاصة عملتي ايه مع العلم بأنه ده حيرفع المصاريف وسعر الكتب جدا

Anonymous said...

هههههههههه تعرفي ياسلمي انا بحمد ربنا ان ابويا مايدنيش على شراء عربية من سنة فاتت اكيد ابويا ده كان عارف انه هيغلي تفتكري انه معاهم ولا ايه ههههههههه تسلمي ودايما مشرفاني

Abd-Alrahman said...

علي فكرة كل الناس حصل معاها الي حصل معاك
وللاسف برضة الكل مستني الفرج بس من غير ما يعمل حاجة
وعلشان كدة الفرج مش هيجي
ان الله لايغر ما بقوم حتي يغيروا ما بانفسهم

علي العموم ربنا معاك ومعانا
مدونتك جميلة او مرة اجي فيها
واتمني اشوف زيارتك في مدونتي

عبدالرحمن

Wish I were a Butterfly ... said...

لا أملك إلا أن أقول
حسبي الله و نعم الوكيل كتييييير

العنوان مسخرة أوي :) افتكرت فعلا المشهد أول ما قرأته و ضحكت

تحياتي يا سلمى.. و ربنا يكون في عون المصريين كلهم

HERO said...

فعلا عندك حق مكنش لازم يبسطنا قوي كده كان كفاية يخلي العلاوة 1% وكنا هنبقى راضيين برضه

اهو ده مصيرنا واحنا اللي عملناه بإدينا

تحياتي

Soooo said...

اهو انتو كده
ولا يعجبكم العجب ولا الصيام في سبتمبر

فيها ايه يعني لما البنزين يغلى شويه
كللو فداءا لمحدودي الدخل
فيها ايه لما السجاير تغلى
كللو فداءا لمحدودي الدخل
فيها ايه لما السولار يزيد حبتين
كللو فداءا لمحدودي الدخل
-----
تقوليش ان محدود الدخل ده مثلا في كوكب عاجي ومش هيحس بالمعاناة اللي هتحصل
!!!!


يا مصبر الوحش .. عالجحش





سلامووووووووووز

المـــفـــــــقــــــــوعـــــة مــرارتـهــا said...

مش كلنا استفدنا من العلاوة لكن كلنا اتلسعنا من الغلاء

MarwaAshraf said...

مش عارفة اقولك ايه.. س إن غدا لناظرة قريب .. وانت عارفة ان "قريب" دي نسبية شوية بس المهم إنه جاي

معلش يا سلمتي

2ensan wnsan said...

سلام عليكم انسه سلمى يا ريته يسمع وما يبسطهاش اكتر من كده

العلاوه 30% والاسعار زادت 260% يا صباح الروقان حكومه رجال اعمال فعلا بيحسبوها صح هما الكسبانيين دايما

ويا ريته كان سمع كلام الحكومه لما قالوله مش هنزود اكتر من 15% بس تعملوا ايه ريس بقى
هشتكنا وبشتكنا يا ريس دانتا رئيس والنعمه كويس

على فكره زيادة سعر البنزين ماجاتش على اصحاب العربيات بس لا دي جت على محدودي الدخل كمان في زياده اسعار كل المواصلات من اول الميكروباصات والتاكسيات والاتوبيسات دا حتى التكتك سامع انه غلي

والسلام ختام

PrInCeSS BeRy said...

الفرج لو من ربنا يبقة احسن من فرج العبد لان فرج العبد زايل الله يسامحهم بقة ويفرجها علينا ربنا تسلمى

الدرعمي said...

بابا سبقك يا عسل

كنا بنتكلم فقال لي حرام أوي

كفاية كده متبسطهاش اكتر من كده

شـمو نشـادر said...

معلش كلنا لها ..
الحكومه دى مش عايزه تجبها معانا البر خالص ..
انا بقول تبيعي بقى العربيه وتقضيها موصلات احسن زى هيرو كده ..
اول زياره ليكي وان شاء الله مش الاخيره ..
وعازمك على كوبايتين شاى فى مدونتى المتواضعه ..
تحياتى ..
أسامة امين

Anonymous said...

ماله البنزين ال 80 مش فاهم

شعب عايز ياكل كرواسون

استغفر الله بقى

انا همشى

بس

لفت نظرى اسم المدونه

Mona Shereif said...

السلام عليكم
مدونتك رائعه وتحمل الكثير من المعانى والخواطر الجميلة
تحياتى ايضا لشخصيتك المميزة